Jëan Fixx “Shocking Dancers”, epílogo de “2084”

Para todxs os que aínda non descubristes os praceres synth metamórficos de “2084”, Jëan Fixx bota o anzol con “Shoking Dancers”, epílogo arrebatador co que se marca unha nova distopía ambient tecno de sabor arrebatado e articulacións rítmicas fraguadas en éxtases cyborg. Todo o que rezuma de “Shocking Dancers” soa a compilación emocional da desbordante onda de sons mutantes destilados no seu primeiro LP. Un “2084” que agora ten continuación nesta memorable celebración dun álbum pleno de códigos sucintos á rave depechemodiana. Desde este enclave estratéxico, Jëan fixx reformula códigos de derribo emocional, en pos das sensacións máis puras, concentradas baixo o exuberante brillo cegador das luces de neón en hora de peche. Melodías aerostáticas que definen a viaxe iniciada con “Planeador”, prima irmá deste single co que Jëan Fixx subliña a particularidade de saber recoñecer trazos propios no espello dos seus irresistibles referentes do mantra dance.